pakistan hvdc - 660 کلو واٹ "مٹیاری – لاہور” ٹرانسمیشن لائن مکمل، بجلی کی ترسیل شروع

سی پیک کے فلیگ شپ منصوبے چھ سو ساٹھ کے وی ایچ وی ڈی سی مٹیاری۔لاہور ٹرانسمیشن لائن نے نیشنل ٹرانسمیشن اینڈ ڈسپیچ کمپنی لمیٹڈ (این ٹی ڈی سی) اور پاک مٹیاری لاہور ٹرانسمیشن لائن کمپنی (پی ایم ایل ٹی سی) کے مابین طے شدہ ٹائم لائن کے مطابق آج یکم ستمبر 2021 سے کمرشل بنیادوں پر بجلی کی ترسیل شروع کر دی ہے۔

کمرشل آپریشن ڈیٹ کے حصول سے پہلے مختلف وولٹیج لیولز پر بجلی کی ترسیل کے 8 مختلف کامیاب ٹیسٹ کیے گئے، ٹرائل آپریشن کا 168 گھنٹوں پر مبنی آخری ٹیسٹ اور صلاحیت کے مظاہرے کا ٹیسٹ 18 اگست کو کیا گیا۔

واپڈا ہاؤس لاہور میں منعقدہ تقریب میں منیجنگ ڈائریکٹر این ٹی ڈی سی اعزاز احمد نے منصوبے کی بروقت تکمیل پر چینی کمپنی پی ایم ایل ٹی سی کی خدمات کو سراہا، انھوں نے کہا اس منصوبے سے اب این ٹی ڈی سی ٹرانسمیشن نیٹ ورک میں مزید استحکام آئے گا۔

تقریب میں چینی کمپنی کی خاتون صدر اور چیف ایگزیکٹو آفیسر مس ژانگ لی بھی شریک تھیں۔

واضح رہے کہ 878 کلومیٹر، 4000 میگا واٹ کا یہ منصوبہ پاک مٹیاری لاہور ٹرانسمیشن کمپنی ( پرائیویٹ ) لمیٹڈ نے 25 سال کی مدت کے لیے بلٹ اون آپریٹ ٹرانسفر (BOOT) کی بنیاد پر مکمل کیا ہے، اس منصوبے سے ملک کے جنوبی حصوں میں واقع بجلی گھروں سے بجلی کی ترسیل کی جائے گی۔