PTI MPA ASAD KHOKHAR BROTHER KILLED - وزیر اعلیٰ پنجاب کی موجودگی میں شادی کی تقریب میں فائرنگ، نامزد وزیر اسد کھوکھر کے بھائی جاں بحق

پی ٹی آئی کے نامزد صوبائی وزیر اسد کھوکھر کے بیٹے کی شادی کی تقریب میں فائرنگ سے ملک اسد کھوکھر کے بھائی جاں بحق ہو گئے۔
نامزد صوبائی وزیر اسد کھوکھر کے بیٹے کی شادی کی تقریب میں فائرنگ سے صوبائی وزیر کے بھائی ملک مبشر کھوکھر عرف گوگا اور ایک نامعلوم شخص زخمی ہو گئے تھے، جنھیں اسپتال لے جایا گیا تاہم ملک گوگا زخموں کی تاب نہ لاتے ہوئے دم توڑ گئے۔
شادی کی تقریب میں وزیر اعلیٰ پنجاب عثمان بزدار بھی موجود تھے، تقریب میں صوبائی وزرا سمیت اہم شخصیات بھی شریک تھیں۔
شہباز گل نے ایک ٹویٹ میں بتایا کہ حملہ آوروں نے وزیر اعلیٰ کی گاڑی کے بالکل قریب آ کر فائرنگ کی تھی، جس پر وزیر اعلیٰ کی سیکیورٹی نے حملہ آور کو پکڑا۔

پولیس کا کہنا ہے کہ اسد کھوکھر کے بھائی کو ٹارگٹ کر کے ان پر قاتلانہ حملہ کیا گیا، فائرنگ کرنے والا شخص پکڑا جا چکا ہے، اور اس کا نام ناظم ہے، اور وہ مانا والا کا رہائشی ہے، جب کہ فائرنگ سے زخمی ہونے والے دوسرے شخص کی شناخت عمر مظہر کے نام سے ہوئی ہے۔

وزیر اعلیٰ پنجاب نے واقعے کی آئی جی سے رپورٹ طلب کر کے تحقیقات کا حکم دے دیا ہے، عثمان بزدار نے حکم دیا ہے کہ سیکیورٹی کے انتظامات سے متعلق بھی جامع انکوائری کی جائے، اور غفلت کے ذمہ داروں کا تعین کر کے مزید کارروائی کی جائے۔

ترجمان پنجاب حکومت مسر جمشید چیمہ کا کہنا ہے کہ فائرنگ کے واقعے کا پتا چلا اور اسی وقت ایک جیپ تیزی سے باہر نکلی تھی، ملک اسد کھوکھر فائرنگ کے واقعے میں محفوظ ہیں، وزیر اعلیٰ پنجاب سمیت تمام اعلیٰ شخصیات بھی محفوظ ہیں۔